| 輔導與成長課程 |
|
| 2006/12/20, Wednesday | |
|
大家好，我叫Jacqueline，係Joanna以前的Client. 05 年2月第一次在輔導室見Joanna的時候，我由坐低第一句話講起就開始喊，一路喊一路講，其實都唔知要講些什麼，但係Joanna聽我講左差唔多半個鐘左右，就開始勸喻我去睇精神科醫生，又話要立刻搬出黎住呀，要換過班朋友呀  等等，我當時真係被呢D建議嚇到呆左！望住坐在我對面這個眼大大、Bady-Face、打扮又好新潮的女仔，心諗係真唔係呀？但係Joanna既眼神同埋語氣係好肯定，仲加埋一個無得商量的表情添！然後她亦以專業輔導員的例牌對白及有點 Cool的態度結束個次見面。但就在我差唔多離開輔導室的時候，她忽然有力地拍了拍我的膊頭，講左：「走啦！」就是這一句說話，這一個舉動，使我感到這外表前衛，但其實心內裡是一位有血有肉有感情的人，呢個似乎係一個非一般的輔導員。咁我決定見下精神科醫生。感謝主，醫生診斷我係輕微的焦慮抑鬱，唔需要食藥，叫我返番去接受輔導。於是，我同Joanna就開始左差唔多一年左右的輔導治療。Joanna首先係對我過去的人生，好似話家庭、友情、愛情、工作到信仰，做了一個很深入而詳細的了解，然後一步步地幫助我離開這些我以前以為係好正常、好安全，但原來係對我的傷害好深的環境。過程真係好辛苦，好似要張個人撕開咁。有幾次我想逃避唔講，但係，坐在對面的Joanna剩係  轆大對眼望住你，木無表情咁等你講！咪睇佢有陣時笑起來好似好甜咁，但其實係一位非常堅持的人。又有時我講到自己好唔掂時，點知時間一到，佢就話今日講到呢到，下次幾時返黎先至再傾，吓！咁都得！個陣我只覺得Joanna態度決絕，俾多幾分鐘都唔怕啦。後來先知道，她用了這個非一般的方法，使我學識左設定界線及堅持立場，原來佢係幫緊我儲緊D力量搬走同埋學習獨立。在輔導過程，Joanna都會推薦一D個人成長課程，有時又會借一D書俾我睇。起初我覺得有無搞錯呀，已經個個禮拜要見輔導，又要睇書，又要做功課，仲要另外俾錢去返學？唔係呀麻！但係一諗到Joanna無得商量個樣的時候，咁我就唯有去報名！點知，原來Joanna佢自己都會返呢D課程，仲係小息的時候，好似朋友咁傾下偈、笑下、窒下大家咁，有時放左學又會一齊去搭地鐵。結果呢，我唔單止明白咩叫做朋友，係呀！我以前連朋友係咩都唔知架！仲有就係一個又一個的成長課程，令我開始識得同自己相處，分辨自己內心感受，原來情緒都有好多種的，呢D都要係返的時候，聽老師深入淺出咁分析。有時，在課程裡面又會有小組討論的時間，在大家互相信任及互相幫助的環境下，我又學識點樣去表達自己的感受，唔會反應過度，或者壓抑過度，同學又會分享佢地點樣處理成長的問題，坦白講，這些是在輔導室學唔到的。 06 年4月係最後一次的輔導後，因為呢位非一般輔導員有非一般的使命，佢要開一間學堂，去拓展神給她在戀愛教育輔導的異象和使命；而我亦已經唔再需要見輔導，因為我的情緒唔單止穩定好多，我又識左好多新朋友，好多時候都覺得好開心。呢個月我地經常都去Shopping，我仲有好幸福的感覺，原來唔單止身體健康係好重要，心靈或者情緒候的健康都係好重要。 祝大家身心靈健康！ |
| < 前一個 |
|---|
好好戀愛學堂 | 首頁
首頁 輔導與成長課程 | 訪客: 1034652 |
© 2008 好好戀愛學堂
